ஆத்திசூடி எளிய உரை

ஆத்திசூடி மூலமும் உரையும்
1. அறஞ்செய விரும்பு.   (பதவுரை) அறம் - தருமத்தை, செய - செய்வதற்கு, விரும்பு - நீ ஆசை கொள்ளு. (பொழிப்புரை) நீ தருமம் செய்ய ஆசைப்படு.	Top of Form Bottom of Form
2. ஆறுவது சினம்.   (பதவுரை) ஆறுவது-தணியவேண்டுவது, சினம்-கோபமாம். (பொழிப்புரை) கோபம் தணியத் தகுவதாம்.	Top of Form Bottom of Form
3. இயல்வது கரவேல்.   (பதவுரை) இயல்வது-கொடுக்கக்கூடிய பொருளை, கரவேல்- (இரப்பவர்களுக்கு) ஒளியாதே, (பொழிப்புரை) கொடுக்க முடிந்த பொருளை இரப்பவர்க்கு ஒளியாமல் கொடு.	Top of Form Bottom of Form
4. ஈவது விலக்கேல்.   (பதவுரை) ஈவது-(ஒருவர்க்கு மற்றொருவர்) கொடுப்பதை, விலக்கேல்-தடுக்காதே. (பொழிப்புரை) ஒருவர் மற்றொருவர்க்குக் கொடுப்பதைக் கொடுக்க வேண்டாமென்று நீ தடுக்காதே.	Top of Form Bottom of Form
5. உடையது விளம்பேல்.   (பதவுரை) உடையது - (உனக்கு) உள்ள பொருளை, விளம்பேல் - (பிறர் அறியும்படி) சொல்லாதே. (பொழிப்புரை) உன்னுடைய பொருளைப் பிறர் அறியும்படி சொல்லாதே.     உன்னுடைய பொருளை அல்லது கல்வி முதலிய சிறப்பை நீயே புகழ்ந்து பேசவேண்டா.	Top of Form Bottom of Form
6. ஊக்கமது கைவிடேல்.   (பதவுரை) ஊக்கம் - (செய்யுந் தொழிலில்) மன எழுச்சியை, கைவிடேல் - கைவிடாதே. (பொழிப்புரை) நீ எத்தொழில் செய்யும்பொழுதும் மனவலிமை யினைக் கைவிடாதே. (அது: பகுதிப்பொருள் விகுதி.)	Top of Form Bottom of Form
7. எண்ணெழுத் திகழேல்.   (பதவுரை) எண் - கணித நூலையும், எழுத்து - இலக்கண நூலையும், இகழேல் - இகழ்ந்து தள்ளாதே. (பொழிப்புரை) கணிதத்தையும், இலக்கணத்தையும் இகழாமல் நன்றாகக் கற்றுக்கொள். (கணிதம் - கணக்கு.)	Top of Form Bottom of Form
8. ஏற்ப திகழ்ச்சி.   (பதவுரை) ஏற்பது-(ஒருவரிடத்திலே போய்) இரப்பது, இகழ்ச்சி- பழிப்பாகும். (பொழிப்புரை) இரந்துண்டு வாழ்வது பழிப்பாகையால் நீ ஒருவரிடத்தும் சென்று ஒன்றை வேண்டாதே.	Top of Form Bottom of Form
9. ஐய மிட்டுண்.   (பதவுரை) ஐயம் - பிச்சையை, இட்டு - (இரப்பவர்களுக்குக்) கொடுத்து, உண் - நீ உண்ணு. (பொழிப்புரை) இரப்பவர்க்குப் பிச்சையிட்டுப் பின்பு நீ உண்ணு.     ஏழைகட்கும், குருடர் முடவர் முதலானவர்கட்கும் பிச்சையிட வேண்டும்.	Top of Form Bottom of Form
10. ஒப்புர வொழுகு.   (பதவுரை) ஒப்புரவு-உலக நடையை அறிந்து, ஒழுகு- (அந்த வழியிலே) நட. (பொழிப்புரை) உலகத்தோடு பொருந்த நடந்துகொள்.	Top of Form Bottom of Form
11. ஓதுவ தொழியேல்   (பதவுரை) ஓதுவது - எப்பொழுதும் படிப்பதை, ஒழியேல் - விடாதே. (பொழிப்புரை) அறிவு தரும் நல்ல நூல்களை நீ எப்பொழுதும் படித்துக்கொண்டிரு.	Top of Form Bottom of Form
12. ஒளவியம் பேசேல்.   (பதவுரை) ஒளவியம் - பொறாமை வார்த்தைகளை, பேசேல் - பேசாதே. (பொழிப்புரை) நீ ஒருவரிடத்தும் பொறாமைகொண்டு பேசாதே.	Top of Form Bottom of Form
13. அஃகஞ் சுருக்கேல்.   (பதவுரை) அஃகம் - (நெல் முதலிய) தானியங்களை, சுருக்கேல் - குறைத்து விற்காதே. (பொழிப்புரை) மிகுந்த இலாபத்துக்கு ஆசைப்பட்டுத் தானியங்களைக் குறைத்து விற்காதே.	Top of Form Bottom of Form
14. கண்டொன்று சொல்லேல்.   (பதவுரை) கண்டு-(ஒன்றைக்) கண்டு, ஒன்று-வேறொன்றை, சொல்லேல் - சொல்லாதே. (பொழிப்புரை) கண்ணாற் கண்டதற்கு மாறாகச் சொல்லாதே. (பொய்ச்சாட்சி சொல்லலாகாது.)	Top of Form Bottom of Form
15. ஙப்போல் வளை.   (பதவுரை) ஙப்போல் - ஙகரம்போல், வளை - உன் இனத்தைத் தழுவு. (பொழிப்புரை) ஙஎன்னும் எழுத்தானது தான்பயனுடையதாயிருந்து பயனில்லாத ஙா முதலிய தன் வருக்க எழுத்துகளைத் தழுவிக் கொள்ளுதல் போல, நீ பயனுடையவனாயிருந்து உன் இனத்தார் பயனில்லாதவராயினும் அவரைத் தழுவிக்கொள்.     [ஙா முதலிய பதினொரெழுத்தும் எந்தச் சொல்லிலும் வருவதில்லை. ஙகரத்தின் பொருட்டே அவற்றையும் சுவடியில் எழுதுகிறார்கள். இனி இதற்கு ஙகர வொற்றானது அகரவுயிர் ஒன்றையே தழுவுவது போல நீ ஒருவனையே தழுவு என மாதர்க்குக் கூறியதாகவும் பொருள் சொல்லலாம்.]	Top of Form Bottom of Form
16. சனிநீ ராடு.   (பதவுரை) சனி-சனிக்கிழமைதோறும், நீர் ஆடு-(எண்ணெய் தேய்த்துக்கொண்டு) நீரிலே தலைமுழுகு (பொழிப்புரை) சனிக்கிழமைதோறும் எண்ணெய் தேய்த்து முழுகு.(புதன்கிழமைகளிலும் முழுகலாம்.)	Top of Form Bottom of Form
17. ஞயம்பட வுரை.   (பதவுரை) ஞயம்பட - இனிமையுண்டாக, உரை - பேசு. (பொழிப்புரை) கேட்பவர்களுக்கு இன்ப முண்டாகும்படி இனிமை யாகப் பேசு. [நயம் என்பதன் போலி.]	Top of Form Bottom of Form
18. இடம்பட வீடெடேல்   (பதவுரை) இடம்பட - விசாலமாக, வீடு - வீட்டை, எடேல் - கட்டாதே (பொழிப்புரை) அளவுக்குமேல் இடம் வீணாய்க் கிடககும்படி வீட்டைப்பெரிதாகக் கட்டாதே. ''சிறுகக் கட்டிப் பெருக வாழ்'' என்பது பழமொழி.	Top of Form Bottom of Form
19. இணக்கமறிந் திணங்கு   (பதவுரை) இணக்கம் - (நட்புக்கு ஏதுவாகிய) நற்குண நற்செய்கைகளை, அறிந்து - ஆராய்ந்தறிந்து, இணங்கு - (பின் ஒருவரோடு) நண்பு கொள். (பொழிப்புரை) நற்குண நற்செய்கை உடையவ ரென்பது தெரிந்து கொண்டு ஒருவரோடு நட்புச் செய.	Top of Form Bottom of Form
20. தந்தைதாய்ப் பேண்   (பதவுரை) தந்தை-பிதாவையும், தாய்-மாதாவையும், பேண்-காப்பாற்று (பொழிப்புரை) உன் தாய் தந்தையரை அன்புடன் போற்றிக் காப்பாற்று.	Top of Form Bottom of Form
21. நன்றி மறவேல்.   (பதவுரை) நன்றி - (ஒருவர் உனக்குச் செய்த) உதவியை, மறவேல் - (ஒருபோதும்) மறவாதே. (பொழிப்புரை) உனக்குப் பிறர் செய்த நன்மையை எப் பொழுதும் மறக்காமல் தீமையை மறந்துவிடு.     உதவி செய்தவர்க்கு ஒருபொழுதும் தீமை செய்தலாகாது.	Top of Form Bottom of Form
22. பருவத்தே பயிர்செய்.   (பதவுரை) பருவத்தே - தக்க காலத்திலே, பயிர்செய்-பயிரிடு. (பொழிப்புரை) விளையும் பருவமறிந்து பயிரிடு.      எச்செயலும் அதற்குரிய காலத்திலே செய்யப்படவேண்டும்.	Top of Form Bottom of Form
23. மன்றுபறித் துண்ணேல்.   (பதவுரை) மன்று - நீதிமன்றத்திலே இருந்துகொண்டு, பறித்து- (வழக்குத் தீர்ப்புக்கு வரும் குடிகளுடைய பொருளைக்) கவர்ந்து, உண்ணேல் - உண்டு வாழாதே. (பொழிப்புரை) நீதிமன்றத்திலே இருந்துகொண்டு இலஞ்சம் வாங்கி வாழாதே.     'மண்பறித் துண்ணேல்' என்று பாடமிருந்தால் பிறர் நிலத்தைக் கவர்ந்து வாழாதே என்று பொருளாம்.	Top of Form Bottom of Form
24. இயல்பலா தனசெயேல்.   (பதவுரை) இயல்பு அலாதன - இயற்கைக்கு மாறான செயல்களை, செயேல் - செய்யாதே. (பொழிப்புரை) நல்லொழுக்கத்திற்கு மாறான செயல்களைச் செய்யாதே.	Top of Form Bottom of Form
25. அரவ மாட்டேல்.   (பதவுரை) அரவம் - (நஞ்சுடைய) பாம்புகளை, ஆட்டேல் - பிடித்து ஆட்டாதே. (பொழிப்புரை) பாம்பைப் பிடித்து ஆட்டி விளையாடாதே.	Top of Form Bottom of Form
26. இலவம்பஞ்சிற் றுயில்.   (பதவுரை) இலவம்பஞ்சில் - இலவம்பஞ்சு மெத்தையிலே, துயில் - உறங்கு. (பொழிப்புரை) இலவம்பஞ்சினாற் செய்த மெத்தையிலே படுத்து உறங்கு.	Top of Form Bottom of Form
27. வஞ்சகம் பேசேல்.   (பதவுரை) வஞ்சகம்-கபடச் சொற்களை, பேசேல்-பேசாதே. (பொழிப்புரை) கபடச் சொற்களைப் பேசாதே.	Top of Form Bottom of Form
28. அழகலா தனசெயேல்.   (பதவுரை) அழகு அலாதன - சிறப்பில்லாத செயல்களை, செயேல் - செய்யாதே. (பொழிப்புரை) இழிவான செயல்களைச் செய்யாதே.	Top of Form Bottom of Form
29. இளமையிற் கல்.   (பதவுரை) இளமையில் - இளமைப் பருவத்திலே, கல் - கல்வியைக் கற்றுக்கொள். (பொழிப்புரை) இளமைப் பருவத்திலேயே படிக்கத்தொடங்கிக் கல்வியைக் கற்றுக்கொள்.	Top of Form Bottom of Form
30. அறனை மறவேல்.   (பதவுரை) அறனை-தருமத்தை, மறவேல் - (ஒருபோதும்) மறவாதே. (பொழிப்புரை) தருமத்தை எப்பொழுதும் மறவாமல் செய்.	Top of Form Bottom of Form
31. அனந்த லாடேல்.   (பதவுரை) அனந்தல் - தூக்கத்தை, ஆடேல் - மிகுதியாகக் கொள்ளாதே. (பொழிப்புரை) மிகுதியாகத் தூங்காதே.	Top of Form Bottom of Form
32. கடிவது மற.   (பதவுரை) கடிவது - (ஒருவரைச்) சினந்து பேசுவதை, மற - மறந்துவிடு. (பொழிப்புரை) யாரையும் கோபத்தாற் கடிந்து பேசாதே.	Top of Form Bottom of Form
33. காப்பது விரதம்.   (பதவுரை) காப்பது - (உயிர்களுக்குத் தீங்கு செய்யாமல் அவற்றைக்) காப்பாற்றுவதே, விரதம் - நோன்பாகும். (பொழிப்புரை) பிற உயிர்களுக்குத் துன்பஞ் செய்யாமல் (அவற்றைக்) காப்பாற்றுவதே தவமாகும்.     தான் செய்யத் தொடங்கிய தருமத்தை விடாமற் செய்வதே விரதம் என்றும் பொருள் சொல்லலாம்.	Top of Form Bottom of Form
34. கிழமைப் படவாழ்.   (பதவுரை) கிழமைப்பட-(உன்உடலும் பொருளும் பிறருக்கு) உரிமைப்படும்படி, வாழ் - வாழு. (பொழிப்புரை) உன் உடம்பாலும் பொருளாலும் பிறருக்கு நன்மை செய்து வாழு.	Top of Form Bottom of Form
35. கீழ்மை யகற்று.   (பதவுரை) கீழ்மை - இழிவானவற்றை, அகற்று - நீக்கு. (பொழிப்புரை) இழிவான குணஞ் செயல்களை நீக்கு.	Top of Form Bottom of Form
36. குணமது கைவிடேல்.   (பதவுரை) குணமது - (மேலாகிய) குணத்தை, கைவிடேல் - கைவிடாதே. (பொழிப்புரை) நற்குணங்களைக் கைசோரவிடாதே. நன்மை தருவ தென்று கண்டறிந்ததைக் கைவிடாதே. அது: பகுதிப்பொருள் விகுதி.	Top of Form Bottom of Form
37. கூடிப் பிரியேல்.   (பதவுரை) கூடி - (நல்லவரோடு) நட்புக்கொண்டு, பிரியேல்-பின் (அவரைவிட்டு) நீங்காதே. (பொழிப்புரை) நல்லவரோடு நட்புச் செய்து பின்பு அவரை விட்டுப் பிரியாதே.	Top of Form Bottom of Form
38. கெடுப்ப தொழி.   (பதவுரை) கெடுப்பது - பிறருக்குக் கேடு செய்வதை, ஒழி - விட்டு விடு. (பொழிப்புரை) பிறருக்குக் கெடுதி செய்வதை விட்டுவிடு (கேடு விளைக்கும் காரியத்தைச் செய்யாதே.)	Top of Form Bottom of Form
39. கேள்வி முயல்.   (பதவுரை) கேள்வி - கற்றவர் சொல்லும் நூற் பொருளைக் கேட்ப தற்கு; முயல் - முயற்சி செய். (பொழிப்புரை) கற்றறிந்தவர்கள் சொல்லும் நூற் பொருளைக்கேட்க முயற்சி செய்.	Top of Form Bottom of Form
40. கைவினை கரவேல்.   (பதவுரை) கைவினை - (உனக்குத் தெரிந்த) கைத் தொழிலை, கரவேல் - ஒளியாதே. (பொழிப்புரை) உனக்குத் தெரிந்த கைத்தொழிலை மற்றவர்களுக்கு ஒளியாமற் செய்.     (ஏதேனும் கைத்தொழில் செய்துகொண்டிரு.)	Top of Form Bottom of Form
41. கொள்ளை விரும்பேல்   (பதவுரை) கொள்ளை-(பிறருடைய பொருளைக்) கொள்ளையிடுதற்கு, விரும்பேல்-ஆசைப்படாதே. (பொழிப்புரை) பிறர் பொருளைக் கவர்ந்துகொள்ள விரும்பாதே.	Top of Form Bottom of Form
42. கோதாட் டொழி.   (பதவுரை) கோது-குற்றம் பொருந்திய, ஆட்டு- விளையாட்டை, ஒழி-நீக்கு. (பொழிப்புரை) குற்றமான விளையாட்டை விட்டுவிடு. கோதாட்டொழி என்பதன்பின் 'கௌவை யகற்று, என்று ஒரு கட்டுரை சில புத்தகங்களில் உள்ளது. 'துன்பத்தை நீக்கு' என்பது இதன் பொருள்.	Top of Form Bottom of Form
43. சக்கர நெறிநில்.   (பதவுரை) சக்கரநெறி – (அரசனது ஆணையாகிய) சக்கரம் செல்லும் வழியிலே, நில் – அடங்கி யிரு. (பொழிப்புரை) அரசன் கட்டளை வழியில் அடங்கி நட.	Top of Form Bottom of Form
44. சான்றோ ரினத்திரு.   (பதவுரை) சான்றோர் – அறிவினால் நிறைந்தவர்களுடைய, இனத்து – கூட்டத்திலே, இரு – எந்நாளும் இரு. (பொழிப்புரை) அறிவொழுக்கங்களில் நிறைந்த பெரியோர்களின் கூட்டத்தைச் சேர்ந்திரு.	Top of Form Bottom of Form
45. சித்திரம் பேசேல்.   (பதவுரை) சித்திரம்-பொய்ம்மொழிகளை, பேசேல்-பேசாதே. (பொழிப்புரை) பொய் வார்த்தைகளை மெய்போலப் பேசாதே.	Top of Form Bottom of Form
46. சீர்மை மறவேல்.   (பதவுரை) சீர்மை-புகழுக்கு ஏதுவாகிய குணத்தை, மறவேல்- மறந்துவிடாதே. (பொழிப்புரை) புகழுக்குக் காரணமானவற்றை மறந்துவிடாதே.	Top of Form Bottom of Form
47. சுளிக்கச் சொல்லேல்.   (பதவுரை) சுளிக்க - (கேட்பவர்) கோபிக்கும்படியாக,சொல்லேல் - (ஒன்றையும்) பேசாதே. (பொழிப்புரை) கேட்பவர்க்குக் கோபமும் வெறுப்பும் உண்டாகும் படி பேசாதே.	Top of Form Bottom of Form
48. சூது விரும்பேல்.   (பதவுரை) சூது-சூதாடலை, விரும்பேல்-(ஒருபோதும்) விரும்பாதே. (பொழிப்புரை) ஒருபொழுதும் சூதாடுதலை விரும்பாதே.	Top of Form Bottom of Form
49. செய்வன திருந்தச்செய்.   (பதவுரை) செய்வன-செய்யும் செயல்களை, திருந்த - செவ்வையாக, செய் - செய். (பொழிப்புரை) செய்யுஞ் செயல்களைத், திருத்தமாகச் செய்.	Top of Form Bottom of Form
50. சேரிடமறிந்து சேர்.   (பதவுரை) சேர் இடம் - அடையத்தகும் (நன்மையாகிய) இடத்தை, அறிந்து - தெரிந்து, சேர் - அடை. (பொழிப்புரை) சேரத்தக்க நல்லிடத்தை ஆராய்ந்தறிந்து சேர்.	Top of Form Bottom of Form
51. சையெனத் திரியேல்.   (பதவுரை) சை என-(பெரியோர் உன்னைச்) சீ என்று அருவருக்கும்படி, திரியேல் - திரியாதே (பொழிப்புரை) பெரியோர் சீ என்று வெறுக்கும்படி வீணாய்த் திரியாதே	Top of Form Bottom of Form
52. சொற்சோர்வு படேல்.   (பதவுரை) சொல்-(நீ பிறரோடு பேசும்) சொற்களில், சோர்வு படேல் - மறதிபடப் பேசாதே (பொழிப்புரை) நீ பிறருடன் பேசும்பொழுதும் மறந்து குற்றமுண்டாகப் பேசாதே	Top of Form Bottom of Form
53. சோம்பித் திரியேல்.   (பதவுரை) சோம்பி - (நீ செய்யவேண்டும் முயற்சியைச் செய்யாமல்) சோம்பல்கொண்டு, திரியேல் - வீணாகத் திரியாதே. (பொழிப்புரை) முயற்சியின்றிச் சோம்பேறியாகத் திரியாதே.	Top of Form Bottom of Form
54. தக்கோ னெனத்திரி.   (பதவுரை) தக்கோன் என - (உன்னைப் பெரியோர்கள்) யோக்கியன் என்று புகழும்படி, திரி - நடந்துகொள். (பொழிப்புரை) பெரியோர்கள் உன்னைத் தக்கவன் என்று புகழும்படி நடந்துகொள்.	Top of Form Bottom of Form
55. தானமது விரும்பு.   (பதவுரை) தானமது - (சற்பாத்திரங்களிலே) தானம் செய்தலை, விரும்பு - ஆசைப்படு. (பொழிப்புரை) தக்கவர்களுக்குத் தானங்கொடுத்தலை விரும்பு.அது: பகுதிப்பொருள் விகுதி	Top of Form Bottom of Form
56. திருமாலுக் கடிமை செய்.   (பதவுரை) திருமாலுக்கு - விட்டுணுவுக்கு, அடிமைசெய் - தொண்டுபண்ணு (பொழிப்புரை) நாராயணமூர்த்திக்குத் தொண்டு செய்.	Top of Form Bottom of Form
57. தீவினை யகற்று.   (பதவுரை) தீவினை-பாவச் செயல்களை, அகற்று-(செய்யாமல்) நீக்கு. (பொழிப்புரை) பாவச் செயல்களைச் செய்யாமல் விலக்கு.	Top of Form Bottom of Form
58. துன்பத்திற் கிடங்கொடேல்.   (பதவுரை) துன்பத்திற்கு - வருத்தத்திற்கு, இடங்கொடேல் - (சிறிதாயினும்) இடங்கொடாதே. (பொழிப்புரை) துன்பத்திற்குச் சிறிதும் இடங்கொடாதே.முயற்சி செய்யும்பொழுது வரும் உடம்பின் வருத்தத்திற்கு அஞ்சி அதனை விட்டுவிடலாகாது	Top of Form Bottom of Form
59. தூக்கி வினைசெய்.   (பதவுரை) தூக்கி - (முடிக்கும் வழியை) ஆராய்ந்து, வினை - ஒரு தொழிலை, செய் - (அதன் பின்பு) செய். (பொழிப்புரை) முடிக்கத் தகுந்த உபாயத்தை ஆராய்ந்தறிந்து ஒரு காரியத்தைச் செய்.	Top of Form Bottom of Form
60. தெய்வ மிகழேல்.   (பதவுரை) தெய்வம் - கடவுளை, இகழேல் - பழிக்காதே. (பொழிப்புரை) கடவுளை இகழ்ந்து பேசாதே	Top of Form Bottom of Form
61. தேசத்தோ டொத்துவாழ்   (பதவுரை) தேசத்தோடு - நீ வசிக்கும் தேசத்திலுள்ளவர்களுடனே, ஒத்து - (பகையில்லாமல்) ஒத்து, வாழ் - வாழு. (பொழிப்புரை) நீ வசிக்கும் தேசத்தவருடன் பகையில்லாமலபொருந்தி வாழு.	Top of Form Bottom of Form
62. தையல்சொல் கேளேல்   (பதவுரை) தையல் - (உன்) மனைவியினுடைய, சொல்- சொல்லை, கேளேல் - கேட்டு நடவாதே. (பொழிப்புரை) மனைவி சொல் கேட்டு ஆராயாமல் நடவாதே.	Top of Form Bottom of Form
63. தொன்மை மறவேல்   (பதவுரை) தொன்மை - பழைமையாகிய நட்பை,மறவேல் - மறந்துவிடாதே (பொழிப்புரை) பழைமையாகிய நட்பினை மறந்துவிடாதே	Top of Form Bottom of Form
64. தோற்பன தொடரேல்   (பதவுரை) தோற்பன-தோல்வியடையக்கூடிய வழக்குகளிலே, தொடரேல்-சம்பந்தப்படாதே (பொழிப்புரை) தோல்வியடையக்கூடிய காரியங்களில் தலையிடாதே.	Top of Form Bottom of Form
65. நன்மை கடைப்பிடி்   (பதவுரை) நன்மை - புண்ணியத்தையே, கடைப்பிடி-உறுதியாகப் பிடி (பொழிப்புரை) நல்வினை செய்தலை உறுதியாகப் பற்றிக்கொள்.	Top of Form Bottom of Form
66. நாடொப் பனசெய்   (பதவுரை) நாடு - உன் நாட்டில் உள்ளோர் பலரும்,ஒப்பன - ஒத்துக்கொள்ளத்தக்க நல்ல காரியங்களை,செய் - செய்வாயாக. (பொழிப்புரை) நாட்டிலுள்ளோர் ஒப்புக்கொள்ளக்கூடிய நல்ல செயல்களைச் செய்.	Top of Form Bottom of Form
67. நிலையிற் பிரியேல்.   (பதவுரை) நிலையில் - (நீ நிற்கின்ற உயர்ந்த) நிலையிலே நின்று, பிரியேல் - (ஒருபோதும்) நீங்காதே. (பொழிப்புரை) உன்னுடைய நல்ல நிலையினின்றும் தாழ்ந்துவிடாதே	Top of Form Bottom of Form
68. நீர்விளை யாடேல்.   (பதவுரை) நீர் - (ஆழம் உள்ள) நீரிலே, விளையாடேல்- (நீந்தி) விளையாடாதே. (பொழிப்புரை) வெள்ளத்திலே நீந்தி விளையாடாதே.	Top of Form Bottom of Form
69. நுண்மை நுகரேல்.   (பதவுரை) நுண்மை - (நோயைத்தருகிற) சிற்றுண்டிகளை,நுகரேல் - உண்ணாதே. (பொழிப்புரை) நோயைத் தரும் சிற்றுண்டிகளை உண்ணாதே	Top of Form Bottom of Form
70. நூல்பல கல்.   (பதவுரை) நூல் பல - (அறிவை வளர்க்கிற) நூல்கள் பலவற்றையும், கல் - கற்றுக்கொள். (பொழிப்புரை) அறிவை வளர்க்கும் பல நூல்களையும் கற்றுக்கொள்.	Top of Form Bottom of Form
71. நெற்பயிர் விளை.   (பதவுரை) (நெற்பயிர் - நெல்லுப் பயிரை, விளை- (வேண்டிய முயற்சி செய்து) விளைவி. (பொழிப்புரை) நெற்பயிரை முயற்சியெடுத்து விளையச்செய்.உழுதுண்டு வாழ்வதே மேல்.	Top of Form Bottom of Form
72. நேர்பட வொழுகு.   (பதவுரை) நேர்பட-(உன் ஒழுக்கம் கோணாமல்) செவ்வைப் பட, ஒழுகு - நட. (பொழிப்புரை) ஒழுக்கந் தவறாமல் செவ்வையான வழியில் நட	Top of Form Bottom of Form
73. நைவினை நணுகேல்.   (பதவுரை) நை - (பிறர்) கெடத்தக்க, வினை - தீவினைகளை, நணுகேல் - (ஒருபோதும்) சாராதே. (பொழிப்புரை) பிறர் வருந்தத்தகுந்த தீவினைகளைச்செய்யாதே.	Top of Form Bottom of Form
74. நொய்ய வுரையேல்.   (பதவுரை) நொய்ய - (பயன் இல்லாத) அற்ப வார்த்தைகளை, உரையேல் - சொல்லாதே. (பொழிப்புரை) வீணான அற்ப வார்த்தைகளைப் பேசாதே.	Top of Form Bottom of Form
75. நோய்க்கிடங் கொடேல்.   (பதவுரை) நோய்க்கு - வியாதிகளுக்கு, இடங்கொடேல்-இடங்கொடாதே. (பொழிப்புரை) உணவு, உறக்கம் முதலியவற்றால் பிணிக்கு இடங்கொடுக்காதே.	Top of Form Bottom of Form
76. பழிப்பன பகரேல்.   (பதவுரை) பழிப்பன - (அறிவுடையவர்களாலே) பழிக்கப் படுவனவாகிய இழி சொற்களை, பகரேல் - பேசாதே. (பொழிப்புரை) பெரியோர்களாற் பழிக்கப்படுஞ் சொற்களைப் பேசாதே. பழிக்கப்படும் சொற்களாவன: பொய், குறளை, கடுஞ்சொல், பயனில் சொல் என்பனவும்; இடக்கர்ச் சொற்களுமாம்.	Top of Form Bottom of Form
77. பாம்பொடு பழகேல்.   (பதவுரை) பாம்பொடு-(பால் கொடுத்தவருக்கும் விடத்தைக்கொடுக்கிற) பாம்பைப்போல்பவர்களுடனே, பழகேல் -சகவாசஞ் செய்யாதே. (பொழிப்புரை) பாம்புபோலும் கொடியவர்களுடன் பழக்கஞ் செய்யாதே.	Top of Form Bottom of Form
78. பிழைபடச் சொல்லேல்.   (பதவுரை) பிழைபட-வழுக்கள் உண்டாகும்படி,சொல்லேல்-ஒன்றையும் பேசாதே. (பொழிப்புரை) குற்ற முண்டாகும்படி பேசாதே.	Top of Form Bottom of Form
79. பீடு பெறநில்.   (பதவுரை) பீடு - பெருமையை, பெற - பெறும்படியாக,நில் - (நல்ல வழியிலே) நில்.. (பொழிப்புரை) பெருமை யடையும்படியாக நல்ல வழியிலே நில்லு.	Top of Form Bottom of Form
80. புகழ்ந்தாரைப் போற்றிவாழ்.   (பதவுரை) புகழ்ந்தாரை-உன்னைத் துதிசெய்து அடுத்தவரை,போற்றி - (கைவிடாமற்) காப்பாற்றி, வாழ் - வாழு. (பொழிப்புரை) அடுத்தவரை ஆதரித்து வாழு.	Top of Form Bottom of Form
81. பூமி திருத்தியுண்.   (பதவுரை) பூமி - (உன்) விளைநிலத்தை, திருத்தி-சீர்திருத்திப்பயிர் செய்து, உண் - உண்ணு. (பொழிப்புரை) பூமியைச் சீர்திருத்திப் பயிர்செய்து உண்ணு.	Top of Form Bottom of Form
82. பெரியாரைத் துணைக்கொள்.   (பதவுரை) பெரியாரை - (அறிவிலே சிறந்த) பெரியோரை,துணைக்கொள் - உனக்குத் துணையாகப் பேணிக்கொள். (பொழிப்புரை) பெரியாரைத் துணையாக நாடிக்கொள்.	Top of Form Bottom of Form
83. பேதைமை யகற்று.   (பதவுரை) பேதைமை - அஞ்ஞானத்தை, அகற்று - போக்கு. (பொழிப்புரை) அறியாமையை நீக்கிவிடு.	Top of Form Bottom of Form
84. பையலோ டிணங்கேல்.   (பதவுரை) பையலோடு - சிறு பிள்ளையோடு, இணங்கேல் - கூடாதே. (பொழிப்புரை) அறிவில்லாத சிறுவனோடு கூடித் திரியாதே.	Top of Form Bottom of Form
85. பொருடனைப் போற்றிவாழ்.   (பதவுரை) பொருள்தனை - திரவியத்தை, போற்றி - (மேன் மேலும் உயரும்படி) காத்து, வாழ் - வாழு. (பொழிப்புரை) பொருளை வீண்செலவு செய்யாமற் பாதுகாத்து வாழு.	Top of Form Bottom of Form
86. போர்த்தொழில் புரியேல்.   (பதவுரை) போர் - சண்டையாகிய, தொழில் - தொழிலை,புரியேல் - செய்யாதே. (பொழிப்புரை) யாருடனும் கலகம் விளைக்காதே.	Top of Form Bottom of Form
87. மனந்தடு மாறேல்.   (பதவுரை) மனம் - உள்ளம், தடுமாறேல் - கலங்காதே. (பொழிப்புரை) எதனாலும் மனக்கலக்க மடையாதே.	Top of Form Bottom of Form
88. மாற்றானுக் கிடங்கொடேல்.   (பதவுரை) மாற்றானுக்கு - பகைவனுக்கு, இடம் கொடேல் - இடங்கொடாதே. (பொழிப்புரை) பகைவன் உன்னைத் துன்புறுத்தும்படி இடங்கொடுக்காதே.	Top of Form Bottom of Form
89. மிகைபடச் சொல்லேல்.   (பதவுரை) மிகைபட - சொற்கள் அதிகப்படும்படி, சொல்லேல் - பேசாதே. (பொழிப்புரை) வார்த்தைகளை மிதமிஞ்சிப் பேசாதே.	Top of Form Bottom of Form
90. மீதூண் விரும்பேல்.   (பதவுரை) மீது ஊண்-மிகுதியாக உண்ணுதலை, விரும்பேல்-இச்சியாதே. (பொழிப்புரை) மிகுதியாக உணவுண்டலை விரும்பாதே.	Top of Form Bottom of Form
91. முனைமுகத்து நில்லேல்.   (பதவுரை) முனைமுகத்து - சண்டை முகத்திலே, நில்லேல் - (போய்) நில்லாதே. (பொழிப்புரை) போர் முனையிலே நின்றுகொண்டிருக்காதே.	Top of Form Bottom of Form
92. மூர்க்கரோ டிணங்கேல்.   (பதவுரை) மூர்க்கரோடு-மூர்க்கத்தன்மையுள்ளவர்களுடனே, இணங்கேல் - சிநேகம் பண்ணாதே! (பொழிப்புரை) மூர்க்கத்தன்மை யுள்ளவர்களுடன் சேர்ந்து பழகாதே.	Top of Form Bottom of Form
93. மெல்லினல்லாள் தோள்சேர்.1   (பதவுரை) மெல் - மெல்லிய, இல் - (உன்) மனையாட்டியாகிய, நல்லாள் - பெண்ணுடைய, தோள் - தோள்களையே, சேர் - பொருந்து. (பொழிப்புரை) பிற மாதரை விரும்பாமல் உன் மனைவியுடன் சேர்ந்து வாழு. 1. மெல்லியா டோன் சேர்' என்றும் பாடம்.	Top of Form Bottom of Form
94. மேன்மக்கள் சொற்கேள்.   (பதவுரை) மேன்மக்கள் - உயர்ந்தோருடைய, சொல் - செல்லை, கேள் - கேட்டு நட. (பொழிப்புரை) நல்லொழுக்கமுடைய பெரியோர் சொல்லைக் கேட்டு நட.	Top of Form Bottom of Form
95. மைவிழியார் மனையகல்.   (பதவுரை) மைவிழியார் - மைதீட்டிய கண்களையுடைய வேசையருடைய, மனை - வீட்டை, அகல் - (ஒருபோதும் கிட்டாமல்) அகன்றுபோ. (பொழிப்புரை) பரத்தையர் மனையைச் சேராமல் விலகு.	Top of Form Bottom of Form
96. மொழிவ தறமொழி.   (பதவுரை) மொழிவது - சொல்லப்படும் பொருளை, அற-(சந்தேகம்) நீங்கும்படி, மொழி - சொல்லு. (பொழிப்புரை)சொல்லுவதை ஐயமின்றித் திருத்தமுறச் சொல்லு.	Top of Form Bottom of Form
97. மோகத்தை முனி.   (பதவுரை) மோகத்தை - ஆசையை, முனி - கோபித்து விலக்கு. (பொழிப்புரை) நிலையில்லாத பொருள்களின் மேலுள்ள ஆசையை வெறுத்துவிடு.	Top of Form Bottom of Form
98. வல்லமை பேசேல்.   (பதவுரை) வல்லமை - (உன்னுடைய) சாமர்த்தியத்தை, பேசேல் - (புகழ்ந்து) பேசாதே. (பொழிப்புரை) உன்னுடைய சாமர்த்தியத்தை நீயே புகழ்ந்து பேசாதே.	Top of Form Bottom of Form
99. வாதுமுற் கூறேல்.   (பதவுரை) வாது - வாதுகளை, முன் - (பெரியோர்) முன்னே, கூறேல் - பேசாதே. (பொழிப்புரை) பெரியோர்களிடத்தில் முற்பட்டு வாதாடாதே.	Top of Form Bottom of Form
100. வித்தை விரும்பு.   (பதவுரை) வித்தை - கல்விப்பொருளையே, விரும்பு - இச்சி. (பொழிப்புரை) கல்வியாகிய நற்பொருளை விரும்பு.	Top of Form Bottom of Form
101. வீடு பெறநில்.   (பதவுரை) வீடு - மோட்சத்தை, பெற - அடையும்படி, நில் - (அதற்குரிய ஞானவழியிலே) நில். (பொழிப்புரை) முத்தியைப் பெறும்படி சன்மார்க்கத்திலே நில்லு.	Top of Form Bottom of Form
102. உத்தம னாயிரு.   (பதவுரை) உத்தமனாய் - உயர்குணமுடையவனாகி, இரு-வாழ்ந்திரு. (பொழிப்புரை) நற்குணங்களிலே மேற்பட்டவனாகி வாழு.	Top of Form Bottom of Form
103. ஊருடன் கூடிவாழ்.   (பதவுரை) ஊருடன் - ஊரவர்களுடனே, கூடி - (நன்மை தீமைகளிலே) அளாவி, வாழ் - வாழு. (பொழிப்புரை) ஊராருடன் நன்மை தீமைகளிற் கலந்து வாழு.	Top of Form Bottom of Form
104. வெட்டெனப் பேசேல்.   (பதவுரை) வெட்டு என - கத்திவெட்டைப்போல, பேசேல் - (ஒருவரோடுங் கடினமாகப்) பேசாதே. (பொழிப்புரை) யாருடனும் கத்திவெட்டுப்போலக் கடினமாகப் பேசாதே.	Top of Form Bottom of Form
105. வேண்டி வினைசெயேல்.   (பதவுரை) வேண்டி - விரும்பி, வினை - தீவினையை,செயேல்-செய்யாதே. (பொழிப்புரை) வேண்டுமென்றே தீவினைகளைச் செய்யாதே.	Top of Form Bottom of Form
106. வைகறைத் துயிலெழு.   (பதவுரை) வைகறை-விடியற்காலத்திலே, துயில்-நித்திரையை விட்டு, எழு - எழுந்திரு. (பொழிப்புரை) நாள்தோறும் சூரியன் உதிக்குமுன்பே தூக்கத்தைவிட்டு எழுந்திரு.	Top of Form Bottom of Form
107. ஒன்னாரைத் தேறேல்.   (பதவுரை) ஒன்னாரை - பகைவர்களை, தேறேல் - நம்பாதே. (பொழிப்புரை) பகைவரை நம்பாதே. 'ஒன்னாரைச் சேரேல்' என்றும் பாடமுண்டு.	Top of Form Bottom of Form
108. ஓரஞ் சொல்லேல்.   (பதவுரை) ஓரம் - பட்சபாதத்தை, சொல்லேல் - (யாதொரு வழக்கிலும்) பேசாதே. (பொழிப்புரை) எந்த வழக்கிலும் ஒருபுடைச் சார்பாகப் பேசாமல் நடுவுநிலையுடன் சொல்லு.              ஆத்திசூடி மூலமும் உரையும்முற்றிற்று.

http://www.tamilvu.org/slet/l6110/l6110son.jsp?subid=3305